काठमाडौं, वैशाख १८ गते । प्रहरी प्रधान कार्यालयले नेकपा एमालेका सांसद लक्ष्मी कोइरी महतो फरार रहेको संसद सचिवालयलाई जानकारी गराएको छ ।
प्रहरी प्रधान कार्यालयले आइतबार संसद सचिवालयलाई पत्र पठाउँदै ज्यान मुद्दा अभियोग लागेका सांसद महतो फरार रहेको जानकारी गराएको हो।
प्रहरी प्रवक्ता डीआईजी कुवेर कडायतले सांसद कोइरी फरार रहेको संसदलाई जानकारी गराएको बताए। ’प्रतिनिधिसभा नियमावली २०७९ बमोजिम हामीले दोस्रोपटक संसदलाई जानकारी गराएका हौं। संसद चलिरहेको बेला सभामुखसँग अनुमति लिएर सांसदलाई पक्राउ गर्नसक्छ। संसद अधिवेशन नभएका बेला पक्राउ गरेर सभामुखलाई जानकारी गराउने प्रावधान छ,’ प्रवक्ता कडायतले भने।
मंसिर ४ गते सम्पन्न प्रतिनिधिसभा निर्वाचनमा सांसद कोइरी महोत्तरी १ बाट निर्वाचित भएका थिए। थमन बिकलाई घेरा हाली कुटपिट गरी हत्या गरेको उनीमाथि अभियोग लागेको छ।
प्रेमबहादुर बिकले दिएको जाहेरीमा महोत्तरी जिल्ला अदालतले महतोलाई एक लाख धरौटीमा रिहा गर्न आदेश दिएको थियो। उक्त आदेशलाई उच्च अदालत जनकपुरले उल्टाएर पुर्पक्षका लागि थुनामा राख्ने आदेश दिएको थियो। सांसद महतोले पटक–पटक तारेख गुजार्दै आएका छन्।
तपाईको प्रतिक्रिया