राष्ट्रपति पौडेलको आगमनमा सर्वदलिय बैठक

जनकपुरधाम, जेठ २० गते । राष्ट्रपतिको आगमनमा नेपाली कांग्रेसका नेता तथा प्रतिनिधीसभा सदस्य विमलेन्द्र निधिको विशेष पहलमा सर्वदलिय बैठक बसेको छ ।
शनिबार जनकपुरधाम उपमहामनगरपालिकाको आयोजनामा राष्ट्रपति रामचन्द्र पौडेलको जनकपुरधाम आगमन कार्यक्रम व्यवस्थापनका लागि उक्त बैठक बसेको हो ।
यहि जेठ ३१ गते जनकपुरधाम आउन लाग्नु भएको राष्ट्रपति पौडेलको स्वागत र नागरिक अभिनन्दन, सुरक्षालगायत व्यवस्थका लागि उक्त सर्बदलिय बैठकको आयोजना गरिएको हो ।
उक्त बैठकमा राष्ट्रपतिको स्वागतमा जनकपुरधाम भ्रमणका विषयमा जानकारी गराउनुहुँदै पुर्व उपप्रधान निधिले,‘ राष्ट्रपति पौडेलले नागरिकता विधेयक प्रमाणीकरण गरेपछि मात्र जनकपुरधाम आउने अठोट लिएकाले विधेयक प्रमाणीकरण पश्चात उहाँ जनकपुरधाम आउन लाग्नु भएको बताउनुभयो । नागरिकता विहिन लाखौं युवाहरुको समस्या समाधान गरी राष्ट्रपति जनकपुरधाम आउन लागेका नेता निधिको भनाई छ । नेता निधीले भन्नुभयो,‘ राष्ट्रपति पौडेलको जनकपुरधाम आएर जानकी मन्दिरमा दर्शन गर्ने इच्छा पहिले देखि नै थियो र नागरिकता विधेयक प्रमाणीकरण गरेर मात्र जनकपुरधाम आउने अठोट पनि उहाँको थियो । त्यसकारण लाखौं युवाहरुको समस्या समाधान गरी राष्ट्रपति जनकपुरधाम आउन लाग्नु भएको हो ।’ राष्ट्रपतिले जनतालाई कुनै पनि मर्का नपर्ने गरी व्यवस्था मिलाउन भन्नुभएको नेता निधिले जानकारी दिनुभयो ।
जनकपुरधाम उपमहानगरपालिकाका प्रमुख मनोजकुमार साहले धनुषाको सबै प्रत्यक्ष र समानुपातिक सांसदहरु सहितको मुल समिति बनाएर त्यसका अधिनमा अन्य उपसमितिहरु बनाएर राष्ट्रपतिको जानकी मन्दिरको पुजापाठ देखि तिरहुतिया गाछीमा हुने भब्य स्वागत र नागरिक अभिनन्दनको कार्यक्रमका लागि तयारी गर्ने सर्वसम्मत निर्णय भएको बताउनुभयो ।
साथै बैठकबाट नागरिकता विधेयक प्रमाणीकरण गरेकोमा राष्ट्रपतिलाई धन्यवाद ज्ञापन मुल समारोह समितिले निर्णय गर्ने र जनकपुरधामको एक चौकमा राष्ट्रपतिद्वारा काठमाण्डौंको माइतीघर मण्डलामा रहेको जस्तै देशको ठुलो झन्डा ठड्याएर फहराउने निर्णय समेत भएको छ ।
विमानबाट जनकपुरधाम आउने राष्ट्रपतिलाई विमानस्थलदेखि जानकी मन्दिर र मन्दिरदेखि तिरहुतिया गाछीसम्म पुग्ने क्रममा सडकको दुवै छेउमा राष्ट्रिय झण्डा सहित उभिएर नागरिक अभिन्दन गर्न सबै दलले आ आफनो कार्यकर्ता र नागरिक समाजलाई परिचालन गर्ने सहमती भएको छ ।
उक्त बैठकमा प्रदेशसभा सांसद रामसरोज यादव र दिपेन्द्र ठाकुरले पनि राष्ट्रपतिको भ्रमण सुखद रहेको बताउदै भब्य र व्यवस्थित बनाउन आफुहरु प्रदेश सरकारलाई समेत यसमा सहभागी गराउन पहल गर्ने बताउनुभयो ।
बैठकमा जनकपुरधामका उपप्रमुख किशोरी साह, धनुषाका प्रमुख जिल्ला अधिकारी सहितका प्रशासनिक निकायका प्रमुखहरु, वृहत्तर जनकपुर क्षेत्र विकास परिषद्का अध्यक्ष शितल साह, उद्योग बाणिज्य संघका अध्यक्ष जितेन्द्र महासेठ सहित दलका नेतासहित नागरिक अगुवाहरुको उपस्थिति थियो ।