पोषण युक्त प्रदेश घोषण गर्न प्रदेश सरकार प्रतिवद्धः मुख्यमन्त्री यादव

जनकपुरधाम, साउन ८ गते । मधेश प्रदेश सरकारको समन्वयमा सञ्चालित पोषण सम्बन्धी प्रदेश स्तरी अन्तरक्रिया कार्यक्रमबाट ग्रामिण महिला विकास तथा एकता केन्द्र (रुडुक) ले चार बुँदे प्रतिवद्धता पत्र जारी गरेको छ ।
रुडुकद्वारा सोमबार जनकपुरधाममा आयोजित पोषणमा गोलमेच सम्वाद कार्यक्रमबाट चार बुँदै जनकपुरधाम २०८० प्रतिवद्धता पत्र जारी गरेको हो ।
उक्त प्रतिवद्धता पत्रमा पोषण सुधारको क्षेत्रमा प्रदेश सरकार स्थानीय तह र सरोकारवाला निकायहरुबीच समन्वय गरी कुपोषणको अन्त्य गर्ने अभियानसँगै पोषणमैत्री र पोषण युक्त स्थानीय तह तथा प्रदेशको रुपमा घोषण गर्ने, परिवार केन्द्रित पोषण शिक्षा र पोषण विशेष कार्यक्रमहरु प्राथमिकताका साथ सञ्चालन गर्दै पोषणको कार्यक्रममा परिवारको सघन संलग्नता र सामाजिक व्यवहार परिवर्तन सँगसँगै गरीबी निवारणसँग सम्बन्धीत कार्यक्रमहरु मार्फत पोषणको क्षेत्रमा सुधार ल्याउने खालका कार्यक्रमहरु सञ्चालन गर्न सम्पूर्ण सरोकारवाला निकायहरुसँग समन्वय गरी पैरवी गर्न, मातृ तथा बालमृत्युदर न्यूनीकरण गर्न र कुपोषणको कारणहरुलाई कम गर्ने खालको क्रियाकलापहरु सञ्चालन गन एक्यवद्धता जनाउन र पोषण विशेष र पोषण सम्वेदनशील कार्यक्रमहरु सञ्चालन गरी पोषण सुधारका क्षेत्रमा रहेको चुनौतीहरुलाई सम्बोधन गरी अवसरहरुको लाभ लिन बहु सरोकारवाला निकायहरुसँग समन्वय गरी कार्यक्रम सञ्चालन गर्ने व्यहहोरा उल्लेख छ ।
उक्त कार्यक्रमको प्रमुख अतिथिका रुपमा रहनु भएका मधेश प्रदेश सरकारका मुख्यमन्त्री सरोजकुमार यादवले पोषण युक्त प्रदेश घोषण गर्न प्रदेश सरकार प्रतिवद्ध रहेको बताउनुभयो । उहाँले मधेशलाई कुपोषण मुक्त प्रदेश घोषण गर्न प्रदेशमा ल्याइने कार्यक्रमलाई स्वागत गर्ने प्रदेश सरकारले समन्वय समेत गर्ने बताउनुभयो ।
मुख्यमन्त्री यादवले शिक्षा, गरिबी तथा पोषणमा सुधार ल्याउन तीनै तहको सरकारसँग समन्वय गर्न प्रदेश सरकार तत्पर छ, भन्नुभयो ।
यसैगरी कार्यक्रममा उपस्थित भौतिक पूर्वाधार विकासमन्त्री कृष्णप्रसाद यादवले संघको आँखाबाट मधेश ओझेलमा परेको छ भन्नुहँदै जनसंख्याको आधारमा बजेट छुट्याउनुपर्ने बताउनुभयो । उहाँले मधेश आन्दोलनपछि संघसंस्था प्रदेशमा आउन हिचकिचाउन थालेका छन्। आए पनि मुख्य सडक वा सदरमुकामका कार्यक्रम गरेर फर्किने गरेका छन् । मधेशका गाउँमा समस्या छन् त्यहाँसम्म पुग्न जरुरी छ, भन्नुहुँदैै कुपोषण मुक्त प्रदेश घोषण गर्ने प्रतिवद्धतालाई प्रदेश सरकारले सकारात्मक रुपमा लिने बताउनुभयो ।
यस्तै स्वास्थ्य तथा जनसंख्यामन्त्री बिरेन्द्रप्रसाद सिंहले ज्ञान र चेतना अभावले कुपोषण तिर प्रदेश लम्कदै छ त्यसैले कुपोषण् जस्ता रोग विरुद्ध लड्न एक ढिक्का भएर लाग्नुपर्ने बताउनुभयो । उहाँले ६ महिनाभित्र पूर्ण खोप मुक्त प्रदेश घोषण गर्ने योजना प्रदेश सरकारको रहेको छ । त्यस्तै कुपोषण मुक्त प्रदेश घोषणा गर्ने अभियानमा एकजुट भएर लाग्न आग्रह समेत गर्नुभयो । मन्त्री सिंहले जनसंखयाका आधारमा प्रदेशमा बजेट दिनुपर्ने भन्नुहुँदै बजेट विनियोजनमा संघ र योजना आयोगको ध्यान मधेश प्रदेशमा नपरेको गुनासो समेत गर्नुभयो ।
रुडुकको संस्थापक अध्यक्ष तथा कार्यक्रमका सभापति प्रतिनिधि सभा सदस्य डा. आरजु राणाले जुनसुकै विचार धाराको पार्टी भएपनि सबैको मुलमन्त्र भनेको देश विकास हो, भन्नुभयो । उहाँले मधेशमा धेरै परिवर्तन आए, धेरै कुरामा सुधार पनि भयो तर, अझैं स्वास्थ्यसँग जोडिएका समस्या निर्मुलन हुन नसकेको बताउनुहुँदै प्रदेश सरकारको योजनामा केन्द्रिय सरकारले पनि सहकार्य गर्नुपर्ने हुन्छ, भन्नुभयो ।
वर्ड भिजनको सहकार्य तथा मधेश प्रदेश सरकारको समन्वयमा आयोजित उक्त कार्यक्रममा वन तथा वातावरणमन्त्री रमेशप्रसाद कुर्मी, उद्योग वाणिजय तथा पर्यटनमन्त्री सुनीता यादव, बिना विभागीय मन्त्री सुरिता साह तथा प्रदेश सचिवहरुलागयतको उपस्थिति रहेको थियो ।