जनकपुरधाम, पुस २१ गते । जनकपुरधाममा पाँच दिने जनकपुर साहियकला तथा अन्तर्राष्ट्रि नाटक महोत्सव आयोजना हुने भएको छ ।
मैथिलि विकास कोषको आयोजनामा मैथिली भाषा, साहित्य, कला, संस्कृति, अर्थ र पर्यटन प्रवद्र्धनका जनकपुरधाममा आगामी माघ १८ गतेदेखि २२ गतेसम्म पाँच दिने जनकपुर साहित्यकला तथा अन्तर्राष्ट्रिय नाटक महोत्सव २०८० हुन लागेको हो ।
मैथिली विकास कोषको बुधबारको बैठकले आउँदो माघ १८ गतेदेखि २२ गतेसम्म हुने जनकपुर साहित्यकला तथा अन्तर्राष्ट्रिय नाटक महोत्सव आयोजना गर्ने निर्णय गरेको छ । महोत्सव जनकपुरधामको महेन्द्र नारायण निधि मिथिला संस्कृतिक केन्द्रमा हुने कोषले जनाएको छ ।
पाँच दिनसम्म चल्ने महोत्सवलाई बीसवटा सत्रमा विभाजन गरिएको मैथिली विकास कोषका अध्यक्ष जीवनाथ चौधरीले जानकारी दिनुभयो । महोत्सवमा राजनीतिक, सामाजिक, साहित्यक र आर्थिक विषयउपर विमर्श हुने कोषका अध्यक्ष चौधरीको भनाई छ ।
महोत्सवमा नेपाल र भारतका कलाकारबाट विभिन्न शीर्षकमा नाटक प्रदर्शन गरिने कार्यक्रम रहेको छ भने मैथिली, नेपाली, हिन्दी, असामी र बङ्गाली गरी पाँचवटा भाषामा नाटक प्रदर्शन समेत हुने अध्यक्ष चौधरीले बताउनुभयो । त्यसका लागि सबै नाट्यकर्मीलाई आमन्त्रण गरिसकेको उहाँले जानकारी दिनुभयो ।
कोषले महोत्सवमा सबै राजनीति दलको राष्ट्रिय अध्यक्ष र दोस्रो वरियताका नेता आमन्त्रणसहित मिथिला चित्रकला, पुस्तक, नाटक, मिथिलाको भोजनको विभिन्न परिकारको प्रदर्शनी तथा सांस्कृतिक कार्यक्रमसमेत हुने जनाएको छ ।
नेपाल र भारतका विद्वान्, विदूषि, सामाजिक अभियन्ता, रङ्गकर्मी तथा राजनीतिकर्मीको सहभागिता रहने उक्त महोत्सवमा सङ्घीयता, भाषानीति, साहित्यका विभिन्न विधा तथा समाजको वर्तमान अवस्थाप्रति मन्थन हुने कोषका अध्यक्ष चौधरीले बताउनुभयो ।
कोषका सदस्य सचिव श्यामसुन्दर शशीले महोत्सव अवधिभर करिब २१ वटा विमर्श सत्रमा जनकपुर गाथाअन्तर्गत जनकपुरधामको निर्माताउपर विशेष विमर्श हुने, मिथिला साहित्य कला, यहाँकी सफल महिलाको सफतलाको कथा प्रस्तुति, युवाको अवस्थालगायत विषयउपर विमर्श हुने बताउनुभयो ।
कोषले प्रत्येक दुई वर्षको अन्तरालमा आयोजना गर्दै आएको साहित्य कला महोत्सव २०७३ सालदेखि निरन्तर चल्दै आएको छ । चौथो पटक हुनगइरहेको महोत्सवलाई मधेश प्रदेश सरकार र जनकपुरधाम उपमहानगरपालिकाले आर्थिक सहयोग गरेका छन् ।
पाँच दिनसम्म चल्ने महोत्सवमा नेपाल र भारत गरी करिब एक लाख दर्शक सहभागी हुने कोषको अनुमान छ ।
तपाईको प्रतिक्रिया