शिवशक्ति माविको शिव र शक्ति भवनको उद्घाटन

जनकपुरधाम, फागुन २ गते ।
विद्याकी देवी सरस्वती पूजाको आराधनासँगै बटेश्वर गाउँपालिकास्थित शिव शक्ति माध्यमिक विद्यालयले छ कोठे र चार कोठे भवनको समुद्घाटन गरेको छ ।
विद्यालयले बुधबार बसन्त पञ्चमीको अवसरमा एक कार्यक्रमको आयोजना गरी गाउँपालिका अध्यक्ष राम अशिष महतोद्वरा छ कोठे “शिव भवन” र चार कोठे “शक्ति भवन” को समुद्घाटन गराएको हो ।
उद्घाटनको क्रममा गाउँपालिका अध्यक्ष महतोले सामुदायिक विद्यालयको गुणस्तर खस्किदै गएको गुनासोका वावजुद यस विद्यालयले शिक्षामा फड्को मारेको बताउनुहुँदै शिक्षामा सुधार हुनु गाउँपालिकाको लागि गर्वको विषय रहेको उल्लेख गर्नुभयो । उहाँले शिक्षालाई गुणस्तर बनाउन विद्यालय र शिक्षकलाई प्रोत्साहन गर्न गाउँपालिका सधै तयार रहने बताउनुभयो । आगामी दिनमा विद्यालयले अझैं प्रगति गर्ने भन्नुहुँदै गाउँपालिका अध्यक्ष महतोले शिक्षा क्षेत्रमा विद्यालयले आमुल परिवर्तन ल्याउने विश्वास समेत व्यक्त गर्नुभयो ।
नमुना गुरुयोजना अन्तर्गत नेपाल सरकारको आर्थिक सहयोग तथा गाउँपालिका र विद्यालयको प्राविधिक सहयोगमा निर्माण भएको उक्त दुई वटा भवन विद्यालयको तेस्रो तल्लामा अवस्थित छन् ।
सोही दिन गाउँपालिका अध्यक्षले विद्यालय परिसरमा तीन तल्ले १२ कोठे प्रशासनिक भवनको समेत शिलान्यास समेत गर्नुभयो ।

उक्त कार्यक्रममा विद्यालयका प्रधानाध्यापक प्रमोद शरण केवट, विद्यालय व्यवस्थापन समितिका अध्यक्ष तथा सदस्यहरुको उपस्थिति रहेको थियो ।