जनकपुर साहित्य महोत्सव: विचार, संस्कृति र सहजीकरणको साझा मञ्च

जनकपुरधाम, माघ २२ गते । विचार र बहसको केन्द्रबिन्दु बनेर जनकपुरधाम पुनः एक पटक जनकपुर साहित्य महोत्सव २०८१ को स्वागत गर्न तयार भएको छ ।
“धरातल, संस्कृति र संस्कारको उत्सव” भन्ने मूल थिमका साथ तीन दिनसम्म चल्ने यस महोत्सवले साहित्यिक विमर्श मात्र होइन, सामाजिक, आर्थिक र राजनीतिक बहसका लागि समेत एउटा जीवित मञ्च तयार गरेको छ ।
महोत्सवको तयारी पूरा भइसकेको आयोजक संस्था नव मिथिला फाउन्डेसनले जानकारी दिएको छ । फाउन्डेशनका अध्यक्ष अमित साहका अनुसार यस वर्ष महोत्सवमा १४ वटा प्यानल छलफल र ३ वटा एकल प्रवचन समावेश छन्, जसले साहित्यको सीमाना मात्र नभई समाजका विविध आयामहरूलाई उजागर गर्नेछ ।

महोत्सवको उद्घाटन कार्यक्रममा ख्यातिप्राप्त लेखक सीके लालले विद्वत् प्रवचन गर्नुहुनेछ । यससँगै, नेपाल विद्युत् प्राधिकरणका महाप्रबन्धक कुलमान घिसिङ ले ‘उज्यालोको यात्रा’ मा आफ्नो अनुभव बाँड्नुहुनेछ भने भारतीय लेखक सुवोधचन्द्र भारतीय ले ‘सीता र रोटीबेटीको सम्बन्ध’ विषयमा विचार राख्नेछन् । खगेन्द्र संग्रौलाले ‘आन्दोलन र साहित्य’ मा आफ्नो विश्लेषण प्रस्तुत गर्नुहुनेछ ।
‘नेपालको परराष्ट्र नीति र सीमाञ्चल’ सत्रमा पत्रकार सुधीर शर्मा, लेखक तुलानारायण साह र इन्द्र अधिकारी को सहभागितामा गहिरो बहस हुनेछ, जुन पत्रकार अनिल गिरी ले सहजीकरण गर्नुहुनेछ ।
‘नेपाली उद्यमीको यात्रा’ मा उद्योगपति सौरभ ज्योति, सुलभ बुढाथोकी र असीममान सिंह ले आफ्ना अनुभव साझा गर्नुहुनेछ भने ‘आनन्दको खोजी’ सत्रमा पत्रकार घनश्याम खड्का र लेखक समा थापा बीच विचार विमर्श हुनेछ ।
यसैगरी महोत्सवको उद्घाटन समारोहमा जनकपुरका १० विद्यालयका ६० जना विद्यार्थीले सामूहिक रूपमा ‘इएह छी हमर जनकपुर’ गीतमा कोरस प्रस्तुति गर्नेछन्, जसले स्थानीय सांस्कृतिक पहिचानलाई उजागर गर्नेछ ।
यस वर्ष महोत्सवमा जनकपुरका चुनौती र अवसरहरू, डिजिटल युगमा पठन संस्कृति, क्रिकेटः समस्या, समाधान र सम्भावना, मधेश महिमाः उद्यमको व्यावसायीकरण, नीतिमा युवाको चासो लगायतका सत्रमा बहस हुने पाmउण्डेशनले जनाएको छ ।
फाउन्डेसनका उपाध्यक्ष आदित्य नेपाल भन्नुहुन्छ्, “यो महोत्सव केवल साहित्यिक उत्सव होइन, जनकपुर र मधेशको सामाजिक, आर्थिक र सांस्कृतिक चेतनाको प्रतिबिम्ब हो । विचारहरूको आदान–प्रदान र नयाँ सोचको विकास यहीँबाट सुरु हुन्छ ।”