नेपाल मधेशी निजामती कर्मचारी मञ्चको नवनिर्वाचित अध्यक्षद्वारा ११ बुँदे घोषणापत्र सार्वजनिक

जनकपुरधाम, चैत १० गते ।
नेपाल मधेशी निजामती कर्मचारी मञ्चको चौथो महाधिवेशनबाट निर्विरोध निर्वाचित केन्द्रीय अध्यक्ष लालबाबु यादवले शनिबार साँझ जनकपुरधाममा आयोजित पत्रकार सम्मेलनमार्फत ११ बुँदे घोषणापत्र सार्वजनिक गर्नुभएको छ ।
जनकपुरधाम घोषणापत्रमा संघ, प्रदेश तथा स्थानीय तहमा कार्यरत निजामती कर्मचारीहरूको सरुवा, बढुवा तथा निजामती सेवा ऐनअनुसारका प्रक्रिया कार्यान्वयन गराउन दबावमूलक भूमिका खेल्ने उल्लेख गरिएको छ। साथै, निजामती कर्मचारीमाथि भइरहेको विभेद अन्त्य गर्दै स्वच्छ, निष्पक्ष र सहज प्रशासनिक सेवा प्रवाहको सुनिश्चितताका लागि पहल गर्ने प्रतिबद्धता व्यक्त गरिएको छ ।
यस्तै, संघीय हस्तक्षेप रोक्न तथा नेपालको संविधानअनुसारका अधिकारको सुनिश्चितताका लागि मञ्चले सक्रिय भूमिका निर्वाह गर्ने बताइएको छ। प्रदेश र स्थानीय तहका कर्मचारीहरूबीच सम्बन्ध सुमधुर बनाउन तथा स्थानीय तहका प्रमुख प्रशासकीय अधिकृतहरू मुख्यमन्त्री तथा मन्त्रिपरिषद्को कार्यालयबाट मात्र खटिनुपर्ने व्यवस्थाको माग गर्ने विषय पनि घोषणापत्रमा उल्लेख गरिएको छ ।
महाधिवेशन यही चैत ७–९ गते जनकपुरधाममा सम्पन्न भएको थियो। महाधिवेशनबाट अध्यक्ष यादवसहित ३९ सदस्यीय केन्द्रीय कार्यसमिति निर्विरोध निर्वाचित भएको छ। नवनिर्वाचित कार्यसमितिमा १० उपाध्यक्ष, एक महासचिव, नौ सचिव, एक कोषाध्यक्ष र १७ सदस्य रहेका छन् ।
नवनिर्वाचित पदाधिकारीमा उपाध्यक्षहरूः ताहिर हुसैन, जवाहरलाल प्रसाद कुर्मी, रामआधार यादव, राकेश रंजन दास, सुजिता कुमारी राउत, सुनिलकुमार पाण्डे, दीपेन्द्रकुमार यादव, रुमाकुमारी झा, कामेश्वर राउत, सत्यनारायण यादव रहेका छन् भने महासचिवः अनिलकुमार साह, सचिवहरूः रामअशिष शर्मा, सत्यनारायण झा, बद्री मण्डल, बैजनाथ सिंह, मनिर अन्सारी, शिवनारायण मण्डल, जितेन्द्र यादव, राधेश्याम चौधरी, सन्ध्या दास र कोषाध्यक्षमा पुष्पाकुमारी मिश्र रहनुभएको छ ।
यस्तै सदस्यहरूः दीपककुमार ठाकुर, सन्दीप पटेल, अम्जद अली अन्सारी, अजयकुमार झा, शशि यादव, राम सुलित महतो, हिराबन यादव, बैधनाथ मण्डल, रविन्द्र राय यादव, अरविन्द झा, मोहनकुमार सिंह, परमानन्द मण्डल, सुनिलकुमार साह, चन्दनकुमार रजक, रिमा दुवे, मनोजकुमार मण्डल, सानी दास
महाधिवेशनमा देशभरका ३३ जिल्लाका मधेशी निजामती कर्मचारीहरूको सहभागिता रहेको थियो । नेपाल मधेशी निजामती कर्मचारी मञ्चको स्थापना वि.सं. २०६३ मा भएको थियो । यसअघि पहिलो महाधिवेशन २०६५ मा लहान, दोस्रो महाधिवेशन २०६८ मा वीरगञ्ज, तेस्रो महाधिवेशन हेटौंडामा सम्पन्न भएको थियो ।