जनकपुरधाम, वैशाख ७ गते । जनकपुरधामका विभिन्न मठ–मन्दिरका महन्त तथा साधुसन्तहरूले जानकी नवमीलाई राष्ट्रिय पर्वको रूपमा घोषणा गर्न माग गरेका छन् ।
रामानन्दिय वैष्णव संघको आयोजनामा जनकपुरधाममा आयोजित पत्रकार सम्मेलनमार्फत उनीहरूले जानकी नवमीलाई केवल धार्मिक पर्व नभई राष्ट्रिय गौरवको रूपमा मनाउनुपर्नेमा जोड दिएका हुन् ।
संघका अध्यक्ष तथा जानकी मन्दिरका महन्तका उत्तराधिकारी रामरोसन दास वैष्णवले यही वैशाख २३ गते पर्ने जानकी नवमी अर्थात् जानकी प्रकाट्य दिवस नेपालभर भव्य रूपमा मनाउन सबैलाई आग्रह गरे।
“यो धार्मिक आस्थासँग जोडिएको पर्व हो। यसलाई जनकपुरवासी मात्र नभई सम्पूर्ण नेपालीले उत्साहका साथ मनाउनुपर्छ,” अध्यक्ष दासले भन्नुभयो, “जानकी माताको त्याग र तपस्यालाई कहिल्यै बिर्सन हुँदैन। त्यसैले उहाँको जन्मोत्सवलाई राष्ट्रिय रूपमा मनाउनु आवश्यक छ।”
उनले जानकी नवमीको अवसरमा देशभर सार्वजनिक विदा दिनुपर्ने माग गर्दै धनुषाका प्रमुख जिल्ला अधिकारीमार्फत प्रधानमन्त्री, गृहमन्त्री र संस्कृति, पर्यटन तथा नागरिक उड्डयनमन्त्रीलाई ज्ञापनपत्र बुझाउने जानकारी पनि दिए।
महन्त दासका अनुसार जानकी नवमीलाई साझा सांस्कृतिक पर्वको रूपमा स्थापित गर्नुपर्ने आवश्यकता रहेको छ।
साथै, नवमीको दिन बिहानै जानकी मन्दिरमा भेला भई दुधमतिमा गरिने शाही स्नानमा सहभागी हुन उनले सम्पूर्ण श्रद्धालुहरूलाई आह्वान गरे।
उक्त अवसरमा जानकी मन्दिर परिसरमा रामायण पाठ, बधाई गानसहित विभिन्न सांस्कृतिक कार्यक्रमहरूको आयोजना गरिने पनि संघले जानकारी दिएको छ।
तपाईको प्रतिक्रिया