जनकपुरधाम, जेठ २३ गते । नेपाली कांग्रेसका सभापति तथा पूर्वप्रधानमन्त्री शेरबहादुर देउवाले जनताको लामो संघर्षबाट प्राप्त गणतन्त्रलाई सुदृढ र संस्थागत गर्न कांग्रेसले अझ प्रभावकारी भूमिका निर्वाह गर्नुपर्ने बताउनुभएको छ।
धनुषा जिल्लाको धनुषाधामस्थित कांग्रेस नेता ठाकुरप्रसाद ढुंगानाको ६२ औँ स्मृति दिवसको अवसर बिहीबार आयोजित सालिक अनावरण कार्यक्रममा बोल्दै सभापति देउवाले गणतन्त्र जनताको पक्षमा स्थापित व्यवस्था भएकाले यसको रक्षा गर्न कांग्रेस सधैं अग्रपंक्तिमा रहने स्पष्ट पार्नुभयो।
उहाँले भन्नुभयो, “गणतन्त्र जनताको पक्षमा स्थापित भएको व्यवस्था हो। यसलाई कमजोर बनाउने कुनै प्रयासलाई सफल हुन दिनु हुन्न। कांग्रेसले यसको रक्षाका लागि अग्रपंक्तिमा रहनुपर्छ।”
कार्यक्रममा सभापति देउवाले ढुंगानाको योगदानको स्मरण गर्दै लोकतन्त्र स्थापनाका लागि उहाँले देखाएको विचार, त्याग र बलिदान आज पनि मार्गदर्शक बनेको उल्लेख गर्नुभयो।
सभापति देउवाले निष्कर्षमा भन्नुभयो, “कांग्रेस विरुद्ध लगाइएको भ्रम चिर्दै, हिमाल, पहाड, तराई र मधेशका जनतालाई एकढिक्का बनाएर सबैको अधिकारका लागि कांग्रेसले आवाज उठाउनेछ।”
तपाईको प्रतिक्रिया