मधेश प्रदेशको पर्यटन विकासका लागि संघ सरकारलाई सात बुँदै माग

मन्त्री कुशवाहाले राष्ट्रिय पर्यटन परिषद्को काठमाडौंमा बुधबार बसेको बैठकमा मधेश प्रदेशको पर्यटन विकासमा संघीय सरकारको सशक्त साझेदारी अपरिहार्य रहेको उल्लेख गर्दै सो मागहरू प्रस्तुत गर्नुभएको हो ।
मन्त्री कुशवाहाले जनकपुर विमानस्थललाई अन्तर्राष्ट्रियस्तरमा स्तरोन्नति गरी भारतका प्रमुख धार्मिक तथा सांस्कृतिक सहरहरू, अयोध्या, लखनउ, वनारस, पटना र दिल्लीसँग सिधा हवाई सेवा सञ्चालन गर्नुपर्ने माग राख्नुभएको छ । साथै, भैरहवा, विराटनगर, नेपालगञ्ज र पोखरालगायत आन्तरिक गन्तव्यहरूसँग हवाई सम्पर्क सुदृढ गर्न संघीय सरकारको पहल आवश्यक रहेको उल्लेख गर्नुभयो ।
प्रदेशका आठवटा प्रमुख नेपाल–भारत नाकामा पर्यटक सूचना केन्द्र स्थापना तथा एकीकृत सुरक्षा प्रणाली लागू गर्नुपर्ने माग गर्दै मन्त्री कुशवाहाले पर्यटकहरूको सहज र सुरक्षित आवागमन सुनिश्चित गर्न विशेष सुरक्षा संयन्त्र सञ्चालन गर्नुपर्नेमा जोड दिनुभएको छ ।
मन्त्री कुशवाहाले जानकी मन्दिरलाई युनेस्कोको विश्व सम्पदा सूचीमा सूचीकृत गराउन संघीय सरकारले प्राविधिक र कूटनीतिक पहल गर्नुपर्ने माग गर्नुभएको छ । साथै, मधेशको परम्परागत सांस्कृतिक तथा वास्तुकलाको संरक्षणका लागि विशेष कार्यक्रम सञ्चालन गर्नुपर्ने आवश्यकता पनि औंल्याउनुभएको छ ।
पर्यटन नीतिनिर्माण, कानुन निर्माण र बजेट व्यवस्थापनमा मधेश प्रदेशको समुचित सहभागिता सुनिश्चित गर्नुपर्ने र संघ, प्रदेश तथा स्थानीय तहबीच समन्वयमा आधारित पर्यटन प्रवद्र्धन कार्यक्रम सञ्चालन गर्नुपर्ने माग मन्त्रीको प्रस्तावमा उल्लेख छ ।
सिमावर्ती भारतीय प्रदेशहरू उत्तर प्रदेश र बिहारसँग धार्मिक तथा सांस्कृतिक पर्यटन प्रवद्र्धनका लागि द्विपक्षीय सम्झौता गरी संयुक्त कार्यक्रमहरू सञ्चालन गर्नुपर्ने प्रस्ताव पनि मन्त्री कुशवाहाले संघीय सरकारलाई गर्नुभएको छ ।
मधेश प्रदेशको पर्यटन प्रचारका लागि “भिजिट मधेश” नामक डिजिटल प्रचार अभियान सञ्चालन गर्नुपर्ने प्रस्ताव राख्दै उहाँले राष्ट्रिय तथा अन्तर्राष्ट्रिय पर्यटकलाई आकर्षण गर्न संघीय सरकारको साझेदारीमा डिजिटल माध्यममार्फत प्रचार अभियान सञ्चालन गर्न जोड दिनुभएको छ ।
मन्त्री कुशवाहाले प्रस्तुत गर्नुभएको ७ बुँदे मागमार्फत मधेश प्रदेशको पर्यटन विकासलाई दिगो रूपमा अगाडि बढाउन संघीय सरकारको नीति, स्रोत र सहकार्य अपरिहार्य देखिन्छ ।