गाउँमा बढ्दो त्रास, ऋण असुलीमा भइरहेको बाधा तथा अदालतको आदेशको अवज्ञा लगायत विषयमा मिथिला विहारी नगरपालिका वडा नं १० ठेराका नागरिक समाजले जिल्ला प्रशासन कार्यालय धनुषामा ज्ञापनपत्र बुझाएका छन् ।
ज्ञापनपत्रमार्फत नागरिकहरूले नेपाल सरकारले निर्माण गरेको अनुचित लेनदेनसम्बन्धी कानुनको दुरुपयोग गरी ऋण लिएर नतिर्ने र ऋण असुल गर्न खोज्दा धम्की दिने, गाउँमा आतंकीकरणको वातावरण सिर्जना गर्ने केही व्यक्तिहरूको नाम समेत उल्लेख गर्दै तीमाथि कानूनी अनुसन्धान र कारवाहीको माग गरेका छन् ।
उनीहरूले अदालतबाट फैसला भइसकेका तथा ऋण भुक्तानी नदिई अचल सम्पत्ति अन्यत्र हक हस्तान्तरण गर्ने, बैंकमा समेत रोक्का राख्ने जस्ता गतिविधिबाट आफूहरू पीडित भएको उल्लेख गरेका छन् । अदालतको आदेशलाई बेवास्ता गर्दै ऋणी पक्षले धम्कीपूर्ण र अवाञ्छनीय गतिविधि गरिरहेको तथा प्रहरी प्रशासनसमेत निष्क्रिय देखिएको आरोप लगाइएको छ ।
ज्ञापनपत्रमा उल्लेख गरिएको छ कि— रिना देवी मण्डल खत्वे, कोशिला देवी पुर्वे, सोमिन्त्रा देवी पुर्वे, निर्मला देवी पुर्वे, सिता देवी मण्डल धानुक, गुरु शरण पुर्वे, गुलो देवी ठाकुर बरही, द्रोपती देवी दास कथवनिया, दुर्गा देवी मण्डल, सोभित साह, रामबाबु दास कथवानी, रघुविर मण्डल खत्वे, रामबहादुर मण्डल खत्वे लगायतले तथाकथित गलत समितिहरू गठन गरी गाउँमा त्रास फैलाउने र अदालतको प्रक्रिया रोक्न दबाब दिने कार्य गरिरहेका छन् ।
प्रहरीले अदालतबाट पठाइएको पकाउ पुर्जी समेत कार्यान्वयन नगरेको भन्दै उनीहरूले प्रहरी प्रशासनको भूमिकाप्रति पनि गम्भीर आपत्ति जनाएका छन् । साथै, उच्च अदालत जनकपुरबाट दिइएको अन्तरिम आदेशको समेत उल्लंघन गर्दै प्रहरी अधिकारीहरूले फोनमार्फत दवाव दिइरहेको आरोपसमेत लगाइएको छ ।
ठेराबजारबाट आएका सयौ संख्यामा आएका नागरिक समाजको जुलुसले नगर प्रर्दशन गर्दै जिल्ला प्रशासन कार्यालय धनुषामा ज्ञापनपत्र बुझाएका छन् । ज्ञापनपत्र बुझाउदै नागरिकसमाजबाट मोहन साहले भने, ‘हामी हाम्रो गाउँमा शान्तिपूर्वक बस्न चाहन्छौं । यी व्यक्तिहरूको गलत गतिविधिमा तत्काल अनुसन्धान गरी कानुन बमोजिम कारवाही होस् । अप्रिय घटना नघट्ने वातावरण सुनिश्चित गरियोस् ।’
ज्ञापनपत्र जिल्ला प्रशासन कार्यालय धनुषामार्फत प्रधानमन्त्री कार्यालय तथा गृह मन्त्रालयमा समेत जानकारीका लागि पठाइएको छ ।
तपाईको प्रतिक्रिया