जनकपुरधाम, साउन १९ गते ।
धनुषा र महोत्तरी जिल्लामा अवस्थित जैन धर्मका ऐतिहासिक स्थलहरू — नेमुवा र मलीवाडाको संरक्षण र प्रवद्र्धनमा देखिएको सरकारी सक्रियताले अब स्थानीय बासिन्दामा रोजगारी, पूर्वाधार विकास र पर्यटन विस्तारको आशा पलाएको छ।
मधेश प्रदेशका मुख्यमन्त्री सतीशकुमार सिंहको पछिल्लो अवलोकन भ्रमण र स्थानीयसँगको छलफलले यी स्थलहरूलाई धार्मिक मात्र नभइ सामाजिक–आर्थिक परिवर्तनका रूपमा समेत अघि बढाउने संकेत देखिएको छ।
शहीदनगर नगरपालिका–७ को नेमुवा र जलेश्वर नगरपालिका–४ को मलीवाडा, जहाँ क्रमशः भगवान श्री मल्लिनाथ र श्री नमिनाथको जन्मस्थल रहेको मानिन्छ, अब व्यवस्थित तवरले विकसित हुने क्रममा छन्।
“हामीलाई धार्मिक पर्यटकहरू यहाँ आउलान् भन्ने आशा छ,” शहीदनगरका एक स्थानवासी भन्छन्, “मन्दिर र तीर्थस्थल निर्माणसँगै होटेल, पसल र गाइडिङ सेवा पनि सुरु गर्न सकिन्छ, जसले रोजगारी दिन सक्छ।”
मुख्यमन्त्री सिंहले भ्रमणको क्रममा “प्रदेश सरकार तीर्थस्थलको संरक्षण र विकासमा नीतिगत तथा वित्तीय सहयोग गर्न प्रतिबद्ध छ,” भन्दै सम्बन्धित निकायलाई आवश्यक प्रक्रिया अघि बढाउन निर्देशन दिनुभएको थियो।
उहाँले भन्नुभयो, “नेमुवा र मलीवाडामा धार्मिक पर्यटनको सम्भावना छ। यस्ता स्थानले सामाजिक सद्भाव र आर्थिक गति दुवै ल्याउन सक्छ।”
जैन धर्मावलम्बीहरूका १९औँ र २१औँ तीर्थंकरको जन्म, दीक्षा र ज्ञान प्राप्तिको स्थल मिथिला क्षेत्रमा रहेको ऐतिहासिकता मात्र नभइ, अन्तरआस्था संवादको दृष्टिले समेत महत्त्वपूर्ण बन्न थालेको छ।
धार्मिक पर्यटनले खासगरी मधेशको मौलिक पहिचान र संस्कृति देखाउने अवसर पनि दिएको बताउँछन् समाजसेवी तथा अनुसन्धानकर्ता राजेन्द्र ठाकुर, “हामीले केवल मन्दिर होइन, मिथिलाको जीवनशैली, खानपान, कला र संगीत पनि पर्यटकसामु पुर्याउने अवसर पाएका छौँ।”
तपाईको प्रतिक्रिया