जनकपुरधाम, भदौ २२ गते ।
मधेशलाई औद्योगिक कोरिडोरको रूपमा स्थापित गर्ने उद्देश्यसहित पहिलो अन्तर्राष्ट्रिय औद्योगिक एक्स्पो २०२५ आगामी कात्तिक २७ देखि ३० गतेसम्म जनकपुरधामस्थित तिरहुतिया गाछीमा आयोजना हुने भएको छ ।
उद्योग, कृषि र अटो एक्स्पो प्रमुख आकर्षणका रूपमा रहने यस प्रदर्शनीले मधेशका युवापुस्तालाई रोजगारी र सीप विकासको अवसर दिलाउने अपेक्षा गरिएको छ । उद्योग परिसंघ मधेश प्रदेशका अध्यक्ष प्रमोद साहका अनुसार, “एक्स्पोमा सहभागी हुँदा उद्योगसँग सम्बन्धित ज्ञान, प्रविधि र व्यावहारिक सिप प्रत्यक्ष रुपमा सिक्ने मौका युवाले पाउनेछन् ।”
एक करोडभन्दा बढीको लागतमा हुने यस आयोजनामा नेपालका विभिन्न प्रदेशका साथै भारतलगायत छिमेकी मुलुकका उद्यमी, लगानीकर्ता, प्राविधिक तथा नवप्रवर्तनकर्ताको सहभागिता रहनेछ । १४० भन्दा बढी स्टल रहने प्रदर्शनीमा प्रत्यक्ष उत्पादन प्रदर्शन, अत्याधुनिक मेसिनरी, स्मार्ट खेती उपकरण, विद्युतीय सवारीसाधन र कृत्रिम बुद्धिमत्तासम्बन्धी प्रविधि प्रदर्शनी गरिनेछ ।
विशेषज्ञहरूले सञ्चालन गर्ने कार्यशाला, प्यानल छलफल र नेटवर्किङ अवसरले मधेशका विद्यार्थी, स्टार्टअप उद्यमी र युवा व्यवसायीलाई नयाँ दृष्टिकोण दिने आयोजकको विश्वास छ ।
उद्योग तथा पर्यटन मन्त्रालय, मधेश प्रदेश, उद्योग विभाग, जनकपुरधाम उपमहानगरपालिका र नेपाल फ्रन्ट फाउन्डर एसोसिएसनको सहकार्यमा हुने एक्स्पोले युवालाई वैदेशिक रोजगारीको विकल्पमा स्वदेशमै अवसर सिर्जना गर्ने सम्भावना देखिएको छ ।
तपाईको प्रतिक्रिया