जनकपुरधाम, असोज २२ गते ।
जनकपुरधाम उपमहानगरपालिका–२० स्थित देवपुरा रुपैठा क्षेत्रमा रहेको तेलिया पोखरीमा उत्पन्न विवादले स्थानीय स्तरमा तनावको स्थिति सिर्जना गरेको छ।
उक्त घटनासँग सम्बन्धित भन्दै हिन्दू सम्राट नेपाल नामक संगठनले वडाध्यक्ष मोहम्मद मोती राइन ‘कबाडी’लाई पदमुक्त गर्न माग गरेको हो ।
संगठनले वडाध्यक्ष राइनले उपमहानगरपालिकाबाट पठाइएका कर्मचारीसँग अभद्र व्यवहार गरेको र धार्मिक द्वन्द्व बढाउने खालका अभिव्यक्ति दिएको आरोप लगाएको छ। हिन्दू सम्राट नेपालले बुधबार सार्वजनिक गरेको विज्ञप्तिमा भनिएको छ, “वडाध्यक्षले तेलिया पोखरीको सार्वजनिक क्षेत्रमाथि कब्जा गरेर बनेको संरचना हटाउने कार्यमा अवरोध पुर्याएका छन्।”
उता, स्थानीय स्रोतका अनुसार उक्त क्षेत्रको स्वामित्व र प्रयोगबारे हिन्दू तथा मुस्लिम दुवै समुदायबीच केही समयदेखि विवाद चल्दै आएको छ। यसअघि प्रमुख जिल्ला अधिकारी, सुरक्षा निकाय, राजनीतिक दलका प्रतिनिधि र दुवै समुदायका अगुवाहरूको सहभागितामा सर्वपक्षीय बैठक बसेर सहमति गराइएको थियो।
तर पछिल्लो घटनाले सहमति कार्यान्वयनमा अवरोध आएको जनाइएको छ। वडाध्यक्ष राइनको तर्फबाट भने औपचारिक प्रतिक्रिया आएको छैन। जनकपुरधाम उपमहानगरपालिकाले घटनाबारे प्रारम्भिक जानकारी संकलन गर्दै आवश्यक छानबिन अघि बढाउने तयारी गरेको जनाएको छ।
स्थानीय बासिन्दाहरूले विवादलाई धार्मिक दृष्टिले होइन, प्रशासनिक र कानूनी रूपमा समाधान गर्नुपर्ने सुझाव दिएका छन्। उनीहरूका अनुसार, “दुवै समुदायबीचको सहमति नै दीर्घकालीन शान्तिको आधार हुनुपर्छ।”
यसबीच हिन्दू सम्राट नेपालले गृह मन्त्रालय, जिल्ला प्रशासन कार्यालय र जनकपुरधाम उपमहानगरपालिकालाई कानूनी कारबाहीको माग गर्दै समाजमा पुनः अशान्ति नफैलियोस् भन्ने आग्रह गरेको छ।
तपाईको प्रतिक्रिया