जनकपुरधाम, असाज २२ गते ।
मधेश प्रदेशमा नयाँ सत्ता समीकरणका लागि राजनीतिक दलहरूबीच छलफल र कूटनीतिक भेटघाट तीव्र बनेका छन्।
नेपाली कांग्रेसले मुख्यमन्त्री सतिशकुमार सिंहको सरकारलाई दिएको समर्थन फिर्ता लिएपछि प्रदेशको राजनीतिक स्थिरता फेरि अनिश्चित बनेको हो ।
यसैबीच, नेपाली कांग्रेसका सभापति शेरबहादुर देउवा र लोकतान्त्रिक समाजवादी पार्टी ९लोसपा० नेपालका अध्यक्ष महन्थ ठाकुरबीच काठमाडौंमा भेटवार्ता भएको छ। दुवै नेताबीचको भेटमा मधेश प्रदेशमा नयाँ सरकार निर्माणमा सहकार्य गर्ने सम्भावनाबारे छलफल भएको बताइन्छ।
लोसपा अध्यक्ष ठाकुरले संवादपछि प्रतिक्रिया दिँदै भने, “संघीय सरकारमा सहकार्य गर्दा मधेश प्रदेशमा लोसपा नेपाललाई मुख्यमन्त्री दिने प्रारम्भिक समझदारी थियो, तर अहिले कांग्रेसले आफ्नो नेतृत्वमा सरकार बनाउन सहयोग मागेको छ। छलफल अझै जारी छ।”
मधेश प्रदेश सभामा हाल १०७ सदस्य छन्, जसमा सरकार गठनका लागि ५४ सदस्यको बहुमत आवश्यक पर्छ। कांग्रेस, लोसपा, जनता समाजवादी पार्टी ९जसपा० र माओवादी केन्द्रबीचको शक्ति सन्तुलनका कारण प्रदेश सरकार गठनमा संख्या र सहमतिको राजनीति निर्णायक हुने देखिएको छ।
राजनीतिक विश्लेषकहरूका अनुसार, मधेशमा अहिलेको सत्ता समीकरण केवल दलगत शक्ति प्रदर्शन होइन, आगामी संघीय निर्वाचनसम्मको राजनीतिक सन्देश पनि हो। “मधेश प्रदेश अहिले संघीय सत्ता समीकरणको सानो रूप जस्तै बनेको छ,” एक विश्लेषकको भनाइ छ।
प्रदेशको स्थिरतासँगै बजेट कार्यान्वयन, विकास योजना र स्थानीय निकायहरूमाथि पर्ने प्रभावबारे पनि सरोकारवालाहरूले चिन्ता व्यक्त गरेका छन्। यसबीच, दलहरूले आ–आफ्नो पक्षमा बहुमत पुर्याउन छलफल तीव्र पारेका छन्।
तपाईको प्रतिक्रिया