जलवायु संकटमा सञ्चारमाध्यमको भूमिका महत्वपूर्ण

जनकपुरधाम, असोज १२ ।
जलवायु परिवर्तनले कृषिमा पारिरहेको प्रत्यक्ष असरबीच सञ्चारमाध्यमलाई सूचना प्रवाह र चेतनाको सेतुका रूपमा सशक्त बनाउनुपर्नेमा सरोकारवालाहरूले जोड दिएका छन् ।
जनकपुरधाममा सामुदायिक रेडियो प्रसारक संघ (अकोराब)ले एफएओ (संयुक्त राष्ट्र खाद्य तथा कृषि संगठन)को सहकार्यमा आयोजना गरेको ‘जलवायु परिवर्तन, कृषि प्रणाली र कृषिमा युवा सहभागिताका लागि सञ्चारमाध्यमको भूमिका’ शीर्षकक छलफल कार्यक्रममा वक्ताहरूले सञ्चारको प्रभावकारी प्रयोगबाट दिगो कृषि र जलवायु–अनुकूल प्रणाली प्रवद्र्धन गर्न सकिने धारणा राखेका छन् ।
मधेश प्रदेशको भूमि व्यवस्था, कृषि तथा सहकारी मन्त्रालयका प्रवक्ता तथा वरिष्ठ पशु विकास अधिकृत डा. सरोज चौधरीले किसानका लागि सरकारले ल्याएका योजना र कार्यक्रमहरूको जानकारी जनस्तरसम्म पु¥याउन सञ्चारमाध्यम मुख्य माध्यम भएको बताउनुभयो । उहाँले पत्रकारसँग समन्वय गर्दै सूचना प्रसारलाई अझ प्रभावकारी बनाउने प्रतिबद्धता पनि व्यक्त गर्नुभयो ।
कृषि निर्देशनालयका वरिष्ठ बागबानी अधिकृत प्रदीप कुमार यादवले जलवायु परिवर्तनको असरबारे प्रदेश सरकारले सञ्चालन गरेका कार्यक्रम पर्याप्त नभएको स्वीकार गर्दै किसानमा चेतना बढाउने काममा सञ्चारमाध्यमको भूमिका अझ महत्वपूर्ण रहेको बताउनुभयो ।
त्यस्तै, एफएओकी प्रतिनिधि रोजिता मिश्रले खाद्य सुरक्षा, जलवायु परिवर्तन न्यूनिकरण र युवाको कृषिमा सहभागिताका लागि सञ्चालित कार्यक्रमको प्रभावकारिता प्रस्तुत गर्दै सञ्चारमाध्यमले ती कार्यक्रमहरूका सकारात्मक प्रभाव आम जनतासम्म पु¥याउन सहयोगी भूमिका खेल्न सक्ने बताउनुभयो ।
नेपाल पत्रकार महासंघ धनुषाका अध्यक्ष पुरन साहले जिल्लास्तरमा कृषि समाचारमा पर्याप्त ध्यान दिन नसकिएको उल्लेख गर्दै आगामी दिनमा कृषिसम्बन्धी रिपोर्टिङ सशक्त बनाउन पत्रकारहरूको विशेष समूह गठन गरिने जानकारी दिनुभयो ।
अकोराबका वरिष्ठ उपाध्यक्ष गोविन्द देवकोटा र मधेश प्रदेश उपाध्यक्ष रीना आलेले कृषिको क्षेत्रमा सञ्चारमाध्यमले सकारात्मक अभ्यास र सफल उदाहरणहरूलाई प्राथमिकताका साथ उजागर गर्नुपर्नेमा जोड दिएका थिए । उहाँहरुले जलवायु परिवर्तनको असर न्यूनिकरण र कृषिमा युवाको सहभागिताबारे प्रेरणादायी कथा र अनुभव प्रसार गरेर पत्रकारहरूले समाजमा परिवर्तन ल्याउन सक्ने विश्वास व्यक्त गरेका थिए ।
कार्यक्रममा पत्रकार, कृषि विज्ञ, किसान र युवाको सक्रिय सहभागिता रहेको थियो । सहभागीहरूले सञ्चारलाई कृषि सुधारको मेरुदण्डका रूपमा प्रयोग गर्नुपर्ने र नीतिगत तहमा पनि सञ्चारमैत्री दृष्टिकोण अपनाउन सरकारलाई सुझाव समेत दिएका थिए ।