भारतद्वारा नेपाललाई निर्वाचन सामग्री दोस्रो खेप हस्तान्तरण

टुडेएनपी संवाददातता
जनकपुरधाम, माघ १६ गते ।
आगामी फागुन २१ गते हुने प्रतिनिधि सभा सदस्य निर्वाचनका लागि भारत सरकारले नेपाललाई निर्वाचनसम्बन्धी सहयोगको दोस्रो खेप उपहारस्वरुप प्रदान गरेको छ ।
बिहीबार संघीय राजधानी काठमाडौँस्थित अर्थ मन्त्रालयमा आयोजित एक समारोहमा भारतीय दूतावासका कार्यवाहक राजदूत डा। राकेश पाण्डेले नेपाल सरकारलाई २५० भन्दा बढी सवारी साधन औपचारिक रूपमा हस्तान्तरण गर्नुभयो। उक्त सामग्री अर्थमन्त्री रामेश्वरप्रसाद खनालको उपस्थितिमा प्रदान गरिएको हो ।
नेपाल सरकारले आगामी निर्वाचनको तयारीका लागि माग गरेबमोजिम उपलब्ध गराइएको यो सहयोग निर्वाचन व्यवस्थापनलाई प्रभावकारी बनाउने उद्देश्यका साथ प्रदान गरिएको जनाइएको छ ।
समारोहमा बोल्दै अर्थमन्त्री खनालले नेपाल–भारतबीच लामो समयदेखि रहँदै आएको सहकार्य र मैत्रीपूर्ण सम्बन्धको चर्चा गर्नुभयो । उहाँले निर्वाचन तयारीमा यी सामग्रीहरूको महत्व उल्लेख गर्दै भारत सरकार र भारतीय जनताप्रति आभार व्यक्त गर्नुभयो ।
भारत सरकारद्वारा प्रदान गरिएको निर्वाचनसम्बन्धी सहयोगको पहिलो खेप यसअघि माघ ६ गते नेपाललाई हस्तान्तरण गरिएको थियो ।
भारतीय पक्षबाट भइरहेको यो सहकार्य दुई देशबीचको बहुआयामिक तथा बहुक्षेत्रीय विकास साझेदारीको प्रतिबिम्बका रूपमा रहेको बताइएको छ । साथै, यसले नेपाल र भारतका जनताबीचको गहिरो आपसी विश्वास र मित्रतालाई समेत उजागर गर्ने छ ।