जनकपुरधाम, माघ २३ गते ।
नागरिक समाज अझै अपेक्षित रूपमा प्रभावकारी बन्न नसकेको भन्दै त्यसको पुनर्संरचना र भूमिकामाथि गम्भीर आत्मसमीक्षा आवश्यक रहेको निष्कर्ष जनकपुरधाममा आयोजित एक अन्तरक्रिया कार्यक्रममा निकालिएको छ ।
सामुदायिक रेडियो प्रसारक संघ नेपालद्वारा शुक्रबार आयोजित “समुदायस्तरमा नागरिक समाजको सुदृढीकरण” विषयक कार्यक्रममा सहभागी वक्ताहरूले दलगत प्रभाव र स्वार्थका कारण नागरिक समाज कमजोर बन्दै गएको धारणा व्यक्त गरका छन् । नागरिक समाजले स्वतन्त्र र निष्पक्ष रहँदै सरकार र आम नागरिकबीच सेतुको काम गर्न नसक्दा शासन प्रणालीमै नकारात्मक असर परेको उनीहरूको भनाइ थियो ।
वक्ताहरूका अनुसार नागरिक समाज जिम्मेवार, संगठित र जनमुखी नबनुन्जेल सरकारलाई जवाफदेही बनाउने भूमिका प्रभावकारी हुन सक्दैन । राजनीतिक दलको छायाँमा सीमित नभई सामाजिक हितलाई प्राथमिकतामा राखेर काम गरे मात्र नागरिक समाज सशक्त बन्न सक्ने उनीहरूको जोड थियो ।
कार्यक्रममा पिपुल प्रमोट सेन्टर धनुषाका अध्यक्ष कमलेश मण्डलले शिक्षा क्षेत्रको सुधारलाई सामाजिक रुपान्तरणको आधारका रूपमा व्याख्या गर्दै त्यसमा नागरिक समाजको सक्रिय संलग्नता अपरिहार्य रहेको बताए । शिक्षा सुधारमार्फत दीर्घकालीन सामाजिक परिवर्तन सम्भव हुने उल्लेख गर्दै उनले सरकारमाथि दबाब सिर्जना गर्न नागरिक समाज अग्रसर हुनुपर्ने धारणा राखे ।
यौनिक तथा लैंगिक अल्पसंख्यक अधिकारकर्मी प्रदीप यादवले राज्य संरचनामा यौनिक तथा लैंगिक अल्पसंख्यक समुदायको प्रतिनिधित्व न्यून रहेको उल्लेख गर्दै समावेशी शासन प्रणाली निर्माणमा नागरिक समाजले पहल लिनुपर्ने बताए । शिक्षा र स्वास्थ्यजस्ता आधारभूत क्षेत्रमा देखिएका असमानता अन्त्य गर्न सामूहिक प्रयास आवश्यक रहेको उनको भनाइ थियो ।
सामुदायिक रेडियो प्रसारक संघ नेपाल, मधेश प्रदेशकी अध्यक्ष उपासना तिवारीले नागरिक समाजको प्रभावकारिता बढाउन आपसी समन्वय, निरन्तर संवाद र सक्रिय सहभागिता अपरिहार्य रहेको बताइन् ।
तपाईको प्रतिक्रिया