जनकपुरधाम, माघ २३ गते ।
निर्वाचन प्रक्रिया बालमैत्री बनाउने दिशामा जनकपुरधाममा क्रियाशील राजनीतिक दलहरूले साझा जिम्मेवारी स्वीकार गरेका छन् । आगामी निर्वाचनका क्रममा प्रचार–प्रसार तथा अन्य गतिविधिमा बालबालिकालाई प्रयोग नगर्ने प्रतिबद्धता उनीहरूले सार्वजनिक रूपमा व्यक्त गरेका हुन् ।
शुक्रबार आयोजित ‘आगामी निर्वाचन र बाल अधिकार संरक्षणको सवाल’ विषयक अन्तरक्रिया कार्यक्रममा सहभागी दलका प्रतिनिधिहरूले निर्वाचनको नाममा बालअधिकार उल्लङ्घन हुन नदिने अडान व्यक्त गरे । बालबालिका शान्ति क्षेत्र राष्ट्रिय अभियानद्वारा आयोजित कार्यक्रममा नेपाली कांग्रेस र जनता समाजवादी पार्टी ९जसपा नेपाल० का प्रतिनिधिहरूले २५ बुँदे निर्वाचन आचारसंहितासम्बन्धी ध्यानाकर्षणपत्र बुझ्दै बालबालिकाको प्रयोग नगर्ने प्रतिबद्धता जनाएका थिए ।
कार्यक्रममा अभियानका अध्यक्ष तिलोत्तम पौडेलले विगतका निर्वाचनहरूमा बालबालिकालाई राजनीतिक गतिविधिमा संलग्न गराउने प्रवृत्ति बढ्दै गएकोप्रति चिन्ता व्यक्त गर्नुभयो । उहाँले बालबालिकाको सुरक्षा, हित र अधिकारलाई केन्द्रमा राखी निर्वाचन प्रक्रिया सञ्चालन गर्न राजनीतिक दलहरूको स्पष्ट र व्यवहारिक प्रतिबद्धता अपरिहार्य रहेको बताउनुभयो ।
निर्वाचनपूर्व, निर्वाचन अवधिभर र निर्वाचनपछि समेत बालअधिकार उल्लङ्घनका घटनाहरू पहिचान गरी ती विषयलाई दलहरूको घोषणापत्रमा समेट्ने उद्देश्यसहित अन्तरक्रिया कार्यक्रम आयोजना गरिएको पौडेलले जानकारी दिनुभयो ।
अनौपचारिक क्षेत्र सेवा केन्द्र ९इन्सेक० का मधेश प्रदेश संयोजक राजु पासमानले निर्वाचन अनुगमनको जिम्मेवारी आफ्नो संस्थालाई दिइएको उल्लेख गर्दै बालअधिकारसँग सम्बन्धित गतिविधिहरूको निगरानीमा सक्रिय रहने प्रतिबद्धता जनाउनुभयो ।
वक्ताहरूले निर्वाचनको प्रचार–प्रसारमा बालबालिकाको प्रयोग गर्नु केवल गैरकानुनी मात्र नभई बालअधिकारमाथिको गम्भीर आघात भएको उल्लेख गर्दै यस्ता अभ्यास अन्त्य गर्न राजनीतिक दल, नागरिक समाज र सरोकारवाला निकाय सबै सचेत र जिम्मेवार बन्नुपर्नेमा जोड दिएका थिए ।
कार्यक्रम सेभ द चिल्ड्रेनको सहकार्यमा बालबालिका शान्ति क्षेत्र राष्ट्रिय अभियान नेपालद्वारा आयोजना गरिएको हो भने बालअधिकारका क्षेत्रमा क्रियाशील नागरिक समाज संस्था सञ्जाल, मधेश प्रदेशसँग समन्वय गरिएको थियो ।
तपाईको प्रतिक्रिया