जनकपुरधाम । आगामी बैशाख ३० गते हुने स्थानीय तहको निर्वाचनमा प्रमुख (मेयर) पदका स्वतन्त्र उम्मेदवार मनोजकुमार साहले आफू निर्वाचित भएपछि जनकपुरधामलाई सुन्दर, आकर्षक र समृद्ध बनाउने दृढता र संकल्पका प्रतिबद्धता पत्र सार्वजनिक गरेका छन् ।
जनकपुरधामस्थित बुधबार एक पत्रकार सम्मेलन मार्फत जनकपुरधाम उपमहानरपालिकाको प्रमुख पदका स्वतन्त्र उम्मेदवार साहले ‘हाम्रो जनकपुरधामः राम्रो जनकपुरधाम, सुन्दर जनकपुरधाम र सफा जनकपुरधाम’ बनाउने मुल नाराका साथ सो प्रतिबद्धता पत्र सार्वजनिक गरेका हुन् ।
नले गरेका २१ बुँदे घोषणापत्रमा जनकपुरधामको फोहर मैला व्यवस्थापन, प्रत्येक वडामा फोहर संकलन केन्द्रको स्थापना, सडक पेटी व्यवस्थापन, ऐतिहासिक धार्मिक, पुरातात्विक तथा साँस्कृतिक सम्पदाको संरक्षण गर्ने सो प्रतिबद्धता पत्रमा उल्लेख गरिएको छ ।
त्यसैगरी स्वतन्त्र उम्मेदवार साहले नगर क्षेत्रभित्र सुरक्षा व्यवस्थाको लागि २४ औं घण्टा काम गर्ने गरी सिसिटीभी क्यामरा जडान गर्ने, प्रत्येक वडामा फ्रि इन्टरनेट सेवा सञ्चालन गर्ने, विमान स्थलको उपमहानगरपालिकालाई महानगरपालिकामा स्तरउन्नति गर्न आवश्यक पूर्वाधार तयार गर्ने, उपमहानगरपालिकाको कामकाज पारदर्शी बनाउने, भ्रष्टाचारलाई शुन्यमा झार्ने, रिंगरोडको निर्माण गर्ने, प्रशासनयन्त्रलाई चुस्तदुरुस्त बनाई सर्वसुलभ सेवा प्रदान गर्ने समेत सो प्रतिबद्धता पत्रमा उल्लेख छ ।
त्यस्तै नगर क्षेत्रभित्र देखिएका लामखुट्टे आतंकलाई नियन्त्रण गर्न दीर्घकालिन योजना बनाउने, दलित जनजाति, उत्पीडित तथा सीमान्तकृत समुदायको पहिचान गरी उनीहरुको आर्थिक, सामाजिक, शैक्षिक, राजनीतिक क्षेत्र बढाई आत्मनिर्भर बनाउने योजना ल्याउने, उपमहानगरपालिका ग्रामीण क्षेत्रका वडाहरुमा कृषि उपज बढाउनका लागि आवश्यक मलखाद्य, विउ विजन, सिंचाई सेवा, कृषि उपकरण र कृषि उपजको बजार व्यवस्थापन गर्ने, फलफुल मण्डी निर्माण गर्ने जस्ता प्रतिबद्धता पत्रमा उल्लेख गरिएको छ ।
प्रतिबद्धता पत्रमा उल्लेख गर्न छुटेका केही कुराहरु जनकपुरधाम हुने विभिन्न धार्मिक महोत्सवको व्यवस्थापनका लागि छुट्टै शाखा स्थापना गर्ने जसले वर्षभरी हुने हरेक महोत्सवको व्यवस्थापनको जिम्मेवारी लिने छ र संचारकर्मीहरुको सुरक्षाका लागि समेत आवश्यक पहल गर्ने जनाएका छन् ।
बैशाख ३० गते हुने निर्वाचनका लागि साहले घण्टा घर चुनाव चिन्ह प्राप्त गरेका छन् ।
तपाईको प्रतिक्रिया