जनकपुरधम । मधेश प्रदेश सभाको बैठकले नीति तथा कार्यक्रम सर्वसम्मतले पारित गरेको छ ।
प्रदेश सभाको नवौं अधिवेशनको बुधबार बसेको पाँचौ बैठकले प्रदेश सरकारको आर्थिक वर्ष २०७९÷८० को नीति तथा कार्यक्रम पारित गरेको हो ।
प्रदेश सभामा प्रदेशका मुख्यमन्त्री लालबाबु राउतले प्रदेश सभा सदस्यहरुले छलफलमा उठाएका प्रश्न र पाँच जना प्रदेश सभा सदस्यहरुले दर्ता गराएका संशोधन प्रस्तावलाई सम्बोधन गरेपछि मुख्यमन्त्री राउतले नीति तथा कार्यक्रम निर्णयार्थ पेस गर्दा सर्वसम्मतले पारित भएको सभामुख सरोजकुमार यादवले जानकारी दिए ।
यस्तै, सोही बैठकमा प्रदेशका अर्थमन्त्री शैलेन्द्रप्रसाद साहले विनियोजन विधेयक २०७९ को सिद्धान्त, उद्देश्य, प्राथमिकता तथा नीति प्रस्तुत गरेका छन् भने गृह तथा सञ्चारमन्त्री भरतप्रसाद साहले प्रदेश सञ्चार ऐन २०७७ लाई संशोधन गर्न बनेको विधेयकमाथि विचार गरियोस् प्रस्तावलाई बैठकमा सर्वसम्मत स्वीकृत दिएको सभामुखले जानकारी समेत दिए र सो ऐनसम्बन्धी संशोधन प्रस्ताव २६ गते दर्ता गराउन प्रदेश सभा सदस्यहरुलाई समय निर्धारण गरिएको थियो । प्रदेश सभाको अर्को बैठक २७ गते ११ बजे बस्ने गरी स्थगित भएको छ ।
मधेश सरकारले आगामी आर्थिक वर्षको नीति तथा कार्यक्रममा शिक्षा, स्वास्थ्य, तथा समाजिक रुपान्तरणका विषयहरुलाई प्राथमिकतामा राखेको छ ।
तपाईको प्रतिक्रिया