गुठीको जग्गा संरक्षण हुनुपर्ने मागसहित आन्दोलनको घोषणा

जनकपुरधाम, चैत ६ गते । नेपालगुठी संस्थानमा देखिएको बेथिति विरुद्ध इतिहासिक प्रजातान्त्रिक जनता पार्टी चरणबद्ध आन्दोलनमा उत्रेको छ ।
विभिन्न मठ मन्दिरका जग्गाहरु संरक्षण गर्न गुठी संस्थान असक्षम देखिएको भन्दै पार्टीले गुठी संस्थान केन्द्रीय कार्यालयमा विभिन्न मागहरु अघि सार्दै ज्ञापन पत्र बुझाएको थियो । संस्थानको सम्पत्ति संस्थानको मात्र नभइ सम्पूर्ण समाजको रहेको भन्दै दिनप्रतिदिन हुँदै गएको सार्वजनिक सम्पत्तिहरुको दुरुपयोग तत्काल बन्द हुनुपर्नेलगायतका माग राख्दै ज्ञापनपत्र बुझाइएको लामो समय वितिसक्दा पनि कुनै सुनुवाई नभएपछि आन्दोलनमा उत्रिन बाध्य भएको पार्टीका केन्द्रीय अध्यक्ष बद्री नारायण ठाकुरले बताए ।
पार्टीले निर्धारित कार्यक्रम अनुसार आइतबार गुठी संस्थान जनकपुरधाम तथा जिल्ला प्रशासन कार्यालय धनुषामा ज्ञापनपत्र बुझाएको छ । सार्वजनिक सम्पत्तिहरुको अतिक्रमण तथा कब्जा भइरहँदा पनि गुठी संस्थान चुप्प लाग्नुले गुठी संस्थानप्रतिको समाजको आस्थामा कमी आएको गुनासो ज्ञापनपत्रमार्फत गरिएको छ ।
‘विगतको इतिहास हेर्दा सम्पत्ति संरक्षणमा संस्थान सक्षम छैन त्यसैले अब सार्वजनिक सम्पत्तिहरुको देखभालको जिम्मेवारी सामाजिक स्तरमा जानुपर्ने समयको माग छ।’ ज्ञापनपत्रमा उल्लेख छ । गुठी संस्थानका कर्मचारीहरुकै मिलेमतोमा सार्वजनिक जग्गाहरुको अतिक्रमणलगायतका कामहरु तत्काल बन्द हुनुपर्ने मागसमेत गरिएको छ ।
गुठीको कर्मचारीहरुबाट गुठीको नाममा भइरहेको आर्थिक अनियमितता,जग्गा जमिन हिनामिनालाई रोक्न गुठी संस्थानका सम्पत्तिको सार्वजनिक रुपमा आय व्यय,पब्लिक अडिट गर्नुपर्नेसहितका सात सूत्रीय माग अघि सार्दै पार्टीले आन्दोलनको कार्यक्रम घोषणा गरेको छ ।
कार्यक्रम अनुसार सोमबार जनकपुरधाम उपमहानगरपालिकामा विरोध जुलुश प्रदर्शन,मंगलबार रिले धर्ना प्रदर्शनसहितका कार्यक्रमहरु पहिलो चरणमा गर्ने जनाइएको छ । त्यसले पनि सुनुवाइ नभए आमरण अनशन कार्यक्रम गरिने चेतावनीसमेत दिइएको छ ।
यता गुठी संस्थान जनकपुरधामका प्रमुख आनन्द प्रसाद कर्माचार्यले ज्ञापनपत्र बुझ्दै समस्याको समाधानका लागि केन्द्रीय कार्यालयमा समन्वय गर्ने प्रतिबद्धता व्यक्त गरेका थिए ।