फागुन २१, काठमाडौं । आज प्रधानमन्त्री केपी शर्मा ओली र नेत्रविक्रम चन्द ‘विप्लव’ले एउटै मञ्चबाट संयुक्त सम्बोधन गर्ने भएका छन् ।
सरकारी वार्ता टोलीका सदस्य डाक्टर राजन भट्टराईका अनुसार आज दिउँसो २ बजे राष्ट्रिय सभागृहमा हुने विशेष समारोहलाई प्रधानमन्त्री ओली र विप्लवले सम्बोधन गर्ने र कार्यक्रममा सरकार र विप्लव समूहबीच हिजो भएको ३ बुँदे सहमतिको विस्तृत विवरण पनि सार्वजनिक हुने छ ।
दुई वर्षदेखि भूमिगत रहेका विप्लवलगायत माथिल्लो तहका नेताहरु आजकै कार्यक्रमबाट सार्वजनिक हुने छन् । सहमतिअनुसार पक्राउ परेका विप्लव समूहका नेता कार्यकर्ता आजैदेखि रिहा हुने छन् ।
सरकार र विप्लव समूहबीच दुई दिनसम्म भएको वार्तापछि सहमति भएको हो । सहमतिअनुसार चन्द समूहमाथि लागेका सबै मुद्दा खारेज हुने भएको छ । विभिन्न किसिमका हिंसात्मक गतिविधिमा संलग्न रहेको भन्दै चन्द समूहका गतिविधिमाथि सरकारले २०७५ साल फागुनमा प्रतिबन्ध लगाएको थियो ।
तपाईको प्रतिक्रिया