फागुन २२, काठमाडौं । प्रधानमन्त्री केपी शर्मा ओलीले संसदमा विश्वासको मत नलिने त्यसको डटेर सामना गर्ने बताएका छन् ।
उनले विधि पद्धतिअनुसार अविश्वासको प्रस्ताव आए त्यसको सामना गर्ने बताएका हुन् । प्रधानमन्त्री ओलीको सिफारिसमा भएको संसद विघटनलाई सर्वोच्च अदालतले बदर गरेपछि पुनस्र्थापित प्रतिनिधिसभाको बैठक भोलि २३ गते बोलाइएको छ ।
त्यसको अघिल्लो दिन आज (शानिबार)ओली समूहले प्रधानमन्त्री निवास बालुवाटारमा संसदीय दलको बैठक बसेको हो । जसमा प्रतिनिधिसभा र राष्ट्रियसभाका गरी ११५ सांसद सहभागी भएको राष्ट्रियसभाका प्रमुख सचेतक खिमलाल भट्टराईले जानकारी दिए ।
त्यस्तै, प्रचण्ड-माधव समूहले संसदीय दलका बहुमत भएको दाबी गरेको छ भने बामदेव गौतमसहित केही सांसद दुवैतिर लागेका छैनन् । आफ्नो समूहका सांसदहरुको बैठकमा दलका नेता एवं प्रधानमन्त्री ओलीले अविश्वासको प्रस्ताव आए सामना गर्ने बताएका हुन् ।
नेकपा कानूनी रुपमा एक रहँदासम्म प्रचण्ड-माधव समूहले प्रधानमन्त्री ओलीविरुद्ध संसदमा अविश्वासको प्रस्ताव ल्याउन नसकिने ओली समूहको दाबी छ । आफूसँग बहुमत रहेकाले ‘संसदमा अविश्वासको प्रस्ताव आयो भने डटेर सामना गर्छौं र जित हाम्रै हुन्छ,’उनले भने ।
तपाईको प्रतिक्रिया