स्थानिय तह निर्वाचनपछि फेरिएको कमला नगरपालिकाको मुहार

धनुषा जिल्लाको पूर्वीउत्तर क्षेत्रमा पर्ने कमला नगरपालिका विकासमा पछाडी परेको ठाउँ थियो । पुस्तौदेखि विकास कुरिरहेको कमला नगरिपालिकाको मुहार भने अहिले फेरिएको छ । स्थानीय तहको निर्वाचनपछि भौतिक पूर्वाधार विकासले गति लिएसँगै यहाँको सडक हिलाम्मेबाट पक्कीमा परिणत भएको छ । ६ वटा गाविसका सबै भूभाग समेटेर कमला नगरपालिका स्थापना भएको हो । धनुषा र सिरहा जिल्ला जोड्ने कमला नदीलाई किनारमै यो नगरपालिका अवस्थित छ ।

४ वर्षको कार्यकालमा कमला नगरपालिकाले विकासमा फड्को मारेको छ । यहाँको अनुभव अरु पालिकाका लागि राम्रो सिकाइ हुनसक्छ । यसै विषयमा केन्द्रीत रहेर कमला नगरपालिकाका नगर प्रमुख रामउदगार गोइतसँगकको अन्तरवार्ताः

स्थानीय तह निर्वाचनपश्चात कमला नगरपालिकामा के–के गर्नु भयो ?

स्थानीय तह निर्वाचन पूर्व कमला नगरपालिका पिछडिएको ठाउँ थियोे । स्थानीय तहको निर्वाचनपश्चात नगर पालिकामा विकास निर्माण सम्बन्धि गतिविधिलाई पहिलो प्राथमिकतामा राखि काम आगाडी बढाउदैं आएका छौं । मोटर तथा कृषि बाटो निर्माण गर्यौं । शिक्षा क्षेत्रमा १२ कक्षामा कृषि प्रयोगशाला स्थापना गरेका छौं । स्वास्थ्य क्षेत्रमा अहिले नौ वटै वडामा स्वास्थ्य चौकीको निर्माण भएको छ । यस्तै प्रत्येक वडामा सामुदायिक भवन पनि निर्माण भएको छ । धार्मिक पर्यटकिय क्षेत्रका मठ मन्दिर संरक्षण गर्ने कार्य गरेका छौ । कृषि क्षेत्रमा कृषि तालिम, पुराना सिचाई मर्मत सम्भार तथा नयाँ निर्माण गरेको छौं, संघीय सरकारसँग कृषि बहुउदेश्यीय परियोजना ल्याउनको लागि पहल हुँदै छ ।

स्थानीय तहमा कति कानुन निमाण गर्नु भयो ?

स्थानीय तहमा कानुन निर्माण गर्ने कुरा गर्दा २/३ क्षेत्रमा मात्र कानुन बनाएका छौं । हामीले शिक्षा क्षेत्रका लागि कानुन निर्माण गरेका छौ । विपद व्यवस्थापन समितिका लागि कानुन बनाएका छौ । बाँकी संविधानअनुसार काम गरिरहेका छौं ।

कोभिड १९ (कोरोना ) महामरीका बेला कमला नगरपालिकाले कति बजेट खर्च गर्यो ?

कमला नगरपालिकाले कोरोनाको पहिलो लहरमा एककरोड भन्दाबढी खर्च गरेको छ । नौवटा वडाको प्रत्येक विद्यालयमा क्वारेन्टाइन व्यवस्थापन गर्दै पिसिआर परिक्षण गरी निको भए घर, नभए प्रादेशिक अस्पताल जनकपुर पठाउनुका साथै राहतको व्यवस्था पनि गरेका थियौं । दोस्रो लहरमा कोभिड अस्पतालको निर्माण गरेर संचालनमा ल्याएका छौं । अहिले पनि कोरोना नियन्त्रण समिति बनाएर निरन्तर काम गरिरहेको स्थिति छ ।

जनताहरुसँग निर्वाचनका बेला गरिएका घोषणा पत्रका कति वटा प्रतिबद्धता पुरा भयो ?

हामीले निर्वाचनका बेला जनतासँग गरिएका प्रतिबद्धता लगभग धेरै पुरा गरेका छौं । शिक्षा क्षेत्रमा सुधार, स्वास्थ्य क्षेत्रमा प्रत्येक नागरिकको पहुँच, महिला स्वरोजगारका लागि विभिन्न सिपमुलक तालिमको निर्माण, ६ वटा वडामा विद्युतको लाइन जडान, कृषि बाटो निर्माणलगायत कार्यहरु गरेका छौ । सिचाँईको लागि केन्द्र सरकारसँग माग गरेका छौ, आशाा छ त्यो पनि पुरा हुन्छ ।

कमला नगरपालिकामा विद्युत्को अवस्था कस्तो छ ? पहिले र अहिलेमा के फरक छ ?

कमला नगरपालिकामा नौ वडा छन् । स्थानिय तहको निर्वाचन हुँदा ती नौ वटा वडामध्ये ६ वटा वडामा विद्युत सेवा थिएन । एक वर्षभित्र त्यहाँ विद्युत जडान गरियो । नगर क्षेत्रभित्र लगभग सबैतिर विद्युत पुर्याएका छौ । कुनै ठाउँमा नयाँ बस्ती छ, त्यहाँ पनि चाँडै नै पुर्याउने प्रयासमा छौं । अहिले विद्युत्को अवस्था पहिला भन्दा धेरै राम्रो भएको छ यसका साथै सबै ठाउँमा इन्टरनेट वाइफाइको व्यवस्था पनि गरेका छौ । अहिलेको अवस्था देखेर यहाँका जनता खुशी छन् ।

नगरपालिकाले आफ्नो प्रशासनिक भवन र आधारभूत अस्पताल निर्माणका लागि के कस्तो पहल गरेको छ ?

नगरपालिकाको आफ्नो प्रशासनिक भवन निर्माणाधिन छ । कोरोनाको कारणले निर्माण कार्यमा केही ढिलासुस्ती भएकोले बजेट फिर्ता गएको छ । प्रशासनिक भवन निर्माणको लागि नगरपालिकाबाट दुई करोड र संघीय सरकारबाट तीन करोड २० लाख प्राप्त भएको थियो । इबिडिङ्ग ठेक्कमा पौने ६ करोड परेको छ । संघ सरकारसँग ठेकेदारको निर्माण कार्य अवधि थप गरि रकम पठाइदिन माग गरेका छौं । त्यस्तै संघीय सरकारबाट प्राप्त हुने १५ शैयाको आधारभूत अस्पताल निर्माणका लागि जग्गा छनोट, डिपीआर, स्वाइल टेस्ट जस्ता प्रकृया पुरा गरि सरकारसँग माग गरेका छौं ।

कोरोना महामारीमा रोजगार गुमाएर स्वदेश फर्किएका वा स्वदेशमै रोजगार गुमाई बेरोजगार भएका युवाहरुका लागि रोजगारी दिने कुरामा के गर्नु भएको छ ?

वैदेशिक रोजगारबाट फर्किएका युवाहरुलाई प्रधान मन्त्री स्वरोजगार कार्यक्रम मार्फत आफ्नै देशमा केही गर्न चाहनेलाई सो कार्यक्रमा सहभागी गराई उनीहरु सिप क्षमताको आधारमा सिर्जना गराउने वातावरण निर्माण गरेका छौं र जो संग सिप छैन तिनीहरुलाई सिप प्रदान गरि आवश्यक साधन स्रोतको व्यवस्था पनि गराइएको छ । जस्तै महिला शसक्तिकरणमा सिपमुलक तालिममा कटाई, सिलाइ तथा बुनार्ई, साबुन सर्फ बनाउने जस्ता अन्य तालिमको समेत व्यवस्था गरेका छौं ।

आगामी दिन एकवर्ष कार्यकाल बाँकी छ यो एक वर्षको अवधिमा के कस्ता कामलाई प्राथमिकतामा राख्नु हुन्छ ?

बाँकीरहेको एक वर्षे कार्यकालमा अपुरा तथा अधुरा रहेका कामलाई प्राथमिकतामा राख्ने छौं । पहिले अधुरा रहेका काम सम्पन्न गरेर मात्र नयाँ कामको सुरुवात गर्ने छौ । यो अन्तरवार्ता दि राईजिङ्ग नेपाल दैनिकमा छ ।