जनकपुरधाम, जेठ ४ गते । ‘पैदल मैत्री र साइकल मैत्री पूर्वाधार विकासलाई प्राथमिकता दिऔं, सडक सुरक्षा र गुणस्तरीय स्वास्थ्य सेवा निर्माणमा सबै जुटौं’ भन्ने नाराका साथ जनकपुरधाममा ८औं संयुक्त राष्ट्रसंघीय विश्व सडक सुरक्षा सप्ताह अवसरमा सडक सुरक्षासम्बन्धी सचेतना कार्यक्रम सम्पन्न भएको छ।
आइतबार जनकपुरधाममा बागमती सेवा समाज नेपालको आयोजनामा सम्पन्न कार्यक्रममा ट्राफिक प्रहरी, विभिन्न गैरसरकारी संस्था, स्थानीय विद्यालय, विद्यार्थी, अभिभावक र सर्वसाधारणको उल्लेखनीय उपस्थिति रहेको थियो।
कार्यक्रम अन्तर्गत जनचेतना र्याली, ट्राफिक नियमसम्बन्धी प्रशिक्षण, विद्यालयस्तरीय सचेतनामूलक पोस्टर प्रदर्शनी तथा सूचना प्रवाहगरिएको थियो।
कार्यक्रममा सहभागी वक्ताहरूले विशेषगरी पैदल यात्री, साइकल प्रयोगकर्ता, बालबालिका, वृद्धवृद्धा र अपांगता भएका व्यक्तिहरूको सुरक्षाका लागि सडक पूर्वाधार सुधारको माग गरेका थिए।
नेपाल ट्राफिक प्रहरीले दैनिक जीवनमा ट्राफिक नियमको पालनाबाट दुर्घटना न्यूनीकरण सम्भव हुने भन्दै सुरक्षामा सबैको भूमिका आवश्यक रहेको जनाएको थियो।
सडक दुर्घटनाको अवस्थाः तथ्य र चिन्ता
विश्व स्वास्थ्य संगठनका अनुसार हरेक वर्ष विश्वभर सडक दुर्घटनाबाट करिब १।३ मिलियन व्यक्तिको मृत्यु हुने गर्छ।
नेपालमा मात्रै वार्षिक २,५०० भन्दा बढीको मृत्यु सडक दुर्घटनाबाट हुने तथ्यांक छ।
मधेश प्रदेश सवारी चाप, ट्राफिक अनुशासन र कमजोर संरचनाका हिसाबले उच्च जोखिममा रहेको क्षेत्र हो।
तपाईको प्रतिक्रिया