जनकपुरधाम, साउन १३ ।
नेपाल विद्युत प्राधिकरणमा कार्यरत दैनिक ज्यालादारी कर्मचारीहरूले आफूहरूलाई मासिक ज्यालादारीमा समायोजन गर्न माग गर्दै दोस्रो दिन पनि धर्ना दिएका छन्।
धर्ना कार्यक्रम जनकपुरधामस्थित प्राधिकरणको मधेश प्रदेश प्रादेशिक कार्यालयमा सोमबारदेखि सुरु भएको हो। मधेश प्रदेश दैनिक ज्यालादारी कर्मचारी संघर्ष समितिको नेतृत्वमा कर्मचारीहरू बिहान १० बजेदेखि दिउँसो २ बजेसम्म काम रोक्दै कालोपट्टी बाँधेर धर्नामा बसेका छन्।
संघर्ष समितिका अनुसार २०८० साउन ३१ गते बसेको प्राधिकरण सञ्चालक समितिको ९४९औँ बैठकमा दैनिक ज्यालादारी कर्मचारीलाई मासिक ज्यालादारीमा समायोजन गर्ने निर्णय गरिएको थियो। तर सो निर्णय अहिलेसम्म कार्यान्वयन नहुँदा कर्मचारीहरूले दबाबस्वरूप आन्दोलन थालेका हुन्।
संघर्ष समिति अध्यक्ष शम्भु मिश्रले पटक–पटक सहमति र सम्झौता हुँदा पनि निर्णय कार्यान्वयन नभएकाले धर्ना गर्नुपरेको बताउनुभयो। “दोस्रो दिनसम्म पनि सम्बन्धित निकायबाट कुनै प्रतिक्रिया नआएकाले हाम्रो आन्दोलन लम्बिन सक्छ,” उहाँले चेतावनी दिनुभयो।
मधेश प्रदेशभर १५ देखि १८ वर्षसम्म सेवा दिँदै आएका ४७८ जना दैनिक ज्यालादारी कर्मचारी नियमित रूपमा कार्यरत रहेको संघर्ष समितिको दाबी छ। उनीहरूले अब पनि निर्णय कार्यान्वयन नभए कडा संघर्षमा उत्रिने चेतावनी दिएका छन्।
तपाईको प्रतिक्रिया